МАГСАРЖАЛАМЫНБАЯРМАГНАЙ

Магсаржаламын Баярмагнай 1978 оны аравдугаар сарын 6-нд Баянхонгор аймагт төрсөн. 1996 онд аймгийнхаа I арван жилийн сургуулийг төгсөөд мөн онд СУИС-ийн кино драмын ангид элсэж, 2000 онд жүжигчин мэргэжлээр төгссөн. Сургуулиа төгсөөд Улсын драмын эрдмийн театрт жил гаруй ажилласны дараа хошин урлагт хөл тавьж, «Эрхэм элч», «Өнгөт инээд» хамтлагт тоглож эхэлжээ.

2007 онд хамтлагийн нөхөд Мөнхсайхан, П.Эрдэнэзаан нарын хамт «Маск» продакшныг үүсгэн байгуулсан нь түүний уран бүтээлийн замналд том эргэлт болсон. Тайз, дэлгэцийн олон бүтээлээр үзэгчдийн хайрыг татсан тэрбээр 2018 оны арванхоёрдугаар сарын 28-нд Монгол Улсын гавьяат жүжигчин цол хүртсэн. Жүжигчин, дуучин, бүжигчин гэсэн олон авьяастайгаас гадна үндэсний бөхийн сумын заан цолтой нь түүнийг бусдаас ялгаруулдаг.

Дэлгэцэнд «Бурхан өршөөг» (2012), «Тусгай ажиллагаа» (2014), «Хөгжилтэй өдөр» (2015), «Би ээж болмоор байна» (2016), «Хөөрхөн ээжтэй охин» (2019), «Таарсан хоёр» (2020) зэрэг кинонд тоглосон. «Нийслэл хүүхэн» цувралын гурван бүтээл, «Архинаас гаргасан чоно» цувралын «Зуун гулууз», «Хадланчид» инээдмийн кинонууд түүнийг өнөөгийн монгол инээдмийн киноны хамгийн танил царайны нэг болгожээ.