Жүжигчин Б.Амарсайхан 1977 оны аравдугаар сарын 17-нд Улаанбаатар хотод мэндэлж, 1999 онд СУИС-ийн кино драмын ангийг төгссөн. Тэрээр өдгөө 30 гаруй уран бүтээлийн гол болон туслах дүрд тоглож, долоон киноны зохиолыг өөрөө бичсэн олон талт авьяастан. “Тавилан”, “Уулын хөх сүүдэр”, “Боолын гэрээ”, “Цасан охин”, “Бодлын хулгайч”, “Аравт” зэрэг бүтээлээр үзэгчдийн хайрыг татсан бол “Үргээлэг” киноны Гарьдын дүрээрээ монголын дэлгэцийн урлагийн сонгодог дүрүүдийн нэгийг бүтээсэн юм. Тэрбээр 2012, 2014 онд Монголын Үндэсний Кино Урлагийн Академийн шилдэг эрэгтэй дүрийн шагналыг хүртжээ. Netflix-ийн “Марко Поло” цувралын Аригбөхийн дүрд тоглохын тулд дэлхийн 1500 гаруй жүжигчинтэй өрсөлдөж, монгол жүжигчний нэрийг олон улсын том тавцанд гаргасан нь түүний карьерын нэгэн онцлох алхам болсон. 2022 онд бие даан ерөнхий найруулагчаар ажилласан анхны бүтээл болох “Эргэж ирэхгүй намар” УСК нь Монгол Улсаас Оскарын шагналд нэр дэвшүүлсэн долоо дахь уран бүтээл болж, 2023 онд Чикагогийн ASIAN POP UP CINEMA наадмаас “Карьерын оргил амжилт” шагналыг хүлээн авчээ. Жүжигчин Амарсайхан гэргий С.Урантайтайгаа 2007 онд гэрлэсэн бөгөөд дөрвөн охин, нэг хүү буюу таван хүүхдийн ааваар аз жаргалтай амьдарч байна.