БАТЗУЛЫНБУЯНТОГТОХ

Батзулын Буянтогтох 1993 оны гуравдугаар сарын 3-нд төрсөн. Увс аймгийн Давст сумаас нийслэлийн 68 дугаар сургуульд шилжин ирж, хотын амьдралд хөл тавьжээ. Аав нь хүүгээ хөдөө аж ахуйн их сургуульд оруулахыг хүсэж байсан ч бага наснаасаа С.Сарантуяа, О.Бат-Өлзий нарын кинонд татагдаж өссөн тэрбээр жүжигчний мэргэжлийг сонгож, 2015 онд СУИС-ийг Ардын жүжигчин Ж.Лхамхүү багшийн удирдлага дор төгссөн.

Оюутан байхдаа «Нарантуул» зах дээр тэрэг түрж ажиллаж байхдаа танилцсан О.Анхсүхтэй хамт кино зураг авалтад туслахаар явж, сошиалд хийсэн богино бичлэгүүдээрээ олны танил болсон. Хоёул ANBU продакшныг үүсгэн байгуулж, SoMedia-г үүсгэн байгуулагч, зураглаач Г.Гүенбаатарын санал, санхүүжилтээр анхны киноо болох «Dolge ажиллагаа»-г бүтээжээ. Үүний дараа өөрийн найруулсан «Нусан багаяа» киноны хоёр ангийг баруун монгол аялгаар хийж, үзэгчдийн хайрыг татсан.

Жүжигчний хувьд «No Rules», «Морьтой л болъё», «Миний шинэ хот», «Манайд ирсэн дурлал», «Аавуудын цэцэрлэг», «Гэрэл», «Архинаас гаргасан чоно» зэрэг кинонд тоглосон. «Хадланчид» кинонд баруун монгол аялгаар ярьсан дүр нь үзэгчдэд таалагдсан нь «Нусан багаяа»-гийн санаа гарах эхлэл болжээ. 2026 оны дөрөвдүгээр сарын 1-нд ANBU продакшны «Манай байр Америк» инээдмийн киног үзэгчдэд хүргэсэн.