ТӨМӨРИЙНХУЛАН

Төмөрийн Хулан 1983 оны нэгдүгээр сарын 21-нд Улаанбаатар хотод төрсөн. 1990–2000 онд нийслэлийн 77 дугаар сургуульд суралцаж, 2000–2004 онд СУИС-д доктор, профессор С.Сугарын удирдлага дор жүжигчин мэргэжлээр суралцаж төгссөн. 2004–2005 онд «Х ТҮЦ» продакшнд ажилласны дараа 2006–2014 онд Улсын драмын эрдмийн театрт жүжигчнээр ажиллаж, 40 гаруй жүжгийн гол болон туслах дүрд тоглосон.

Тайзан дээр «Гамлет»-ийн Офелия, «Тэнгэрийн хүү»-гийн Шива бага хатан ба Шагэ их хатан, «Лусын дагина», «Анна Каренина», Бертольт Брехтийн «Сычуаны сайн хүн» жүжгийн Шэн Ти, Шуй Та зэрэг дүрийг бүтээсэн. 2015 онд гэр бүлийн студи болох «Гөү-Адвэнчур» ХХК-д продюсер, жүжигчнээр ажиллаж 10 гаруй кино, контент бэлтгэсэн бөгөөд 2022 оноос УДЭТ-ын Уран бүтээлийн хэлтэст жүжигчнээр ажиллаж байна. 2011 онд Соёлын тэргүүний ажилтан болж, 2023 онд төрийн дээд шагнал «Алтан гадас» одонгоор шагнагдсан.

Дэлгэцэнд «Чиний эзгүйд» (2005) киногоор гараагаа эхэлж, «Нэг нарны дор», «Сарны нулимс», «Зөрлөг», «Хайрын рекорд», «Мамма миа», «Тусгай ажиллагаа», «ТҮЦ-ний охид», «Гэрлэн дохио», «Миний нууц», «Хадмын хайр», «Соёг» зэрэг 30 гаруй бүтээлд тоглосон. Сүүлийн жилүүдэд «Нутгийн зүг»-ийн Бурмаа, «Застав»-ын Оюун, «Амьдрах сайхан»-ы Заяа, «Галбингаа»-гийн Оюунгэрэл зэрэг дүрээрээ үзэгчдэд дахин дотно болсон. «ТҮЦ-ний охид», «Эмэгтэйн кейс» кинонуудын ерөнхий продюсерээр ажилласан.