ДАШЗЭВЭГИЙНПҮРЭВСҮРЭН

Дашзэвэгийн Пүрэвсүрэн 1981 оны тавдугаар сарын 30-нд Улаанбаатар хотод төрж, бага насаа 40 мянгатад өнгөрүүлсэн. Дээрээ хоёр ах, хоёр эгчтэй айлын отгон охин бөгөөд аав нь Барилгын зургийн институтийн инженер, ээж нь Мод боловсруулах үйлдвэрт эдийн засагчаар ажиллаж байжээ. Нийслэлийн 24 дүгээр сургуулийг төгсөөд 2005 онд СУИС-ийг жүжигчин мэргэжлээр, 2009 онд Удирдлагын академийг бизнесийн менежерээр төгссөн. Мөн Сингапурт хэлний мэдлэгээ дээшлүүлсэн.

1998 оноос загвар өмсөгчөөр гараагаа эхэлсэн тэрбээр 2006 онд «Гоёл» наадмын «Топ модель» өргөмжлөлийг хүртсэн. Дэлгэцэнд «Боолын гэрээ» киногоор анхны гол дүрээ бүтээж, үргэлжлүүлэн «Гоёлын даашинз», «Цасан охин», «Гэр», «Амьдрал төсөл», «Ларьдма», «Хожлын нүүдэл», «Хоёр амь», «Би эмэгтэй хүн» зэрэг 10 гаруй уран сайхны кинонд тоглосон. «Хувьсал» продакшны жүжигчин байхдаа «Чамайг би уучилна», «Би ч гэсэн хүн» жүжгүүдийн гол дүрд тоглож, 30 гаруй дууны клипэнд дүр бүтээжээ.

Кино, урлагт оруулсан хувь нэмрийг нь үнэлж төрөөс 2013 онд Соёлын тэргүүний ажилтан цол тэмдгээр шагнасан. Урлагийн хүрээнийхэн, үзэгчид түүнийг «Пүүжээ» хэмээн дотночлон дууддаг. Өдгөө уул уурхайн салбарын бизнесмен Б.Ганбаяртай гэр бүл болж, дөрвөн хүүхдийн халамжит ээж, өнөр өтгөн айлын эзэгтэй болсон.