ОТГОНБАЯРЫНАНХСҮХ

Отгонбаярын Анхсүх 1993 оны гуравдугаар сарын 14-нд төрсөн. Дунд сургуулиа төгсөөд барилгын мэргэжлээр коллежид элссэн ч урлагийн үзлэг, соёлын наадамд байнга оролцсоор жүжигчин болохоор шийджээ. СУИС-ийн шалгалтад найзтайгаа нэг, хоёрдугаар байрт эрэмбэлэгдэж тэнцээд 2015 онд Ардын жүжигчин Ж.Лхамхүү багшийн удирдлага дор жүжигчин мэргэжлээр төгссөн. Ээж, дүүтэйгээ өссөн айлын том хүүг энэ мэргэжлийг сонгоход хамгийн их дэмжсэн хүн нь ээж нь байжээ.

Сургуулиа төгсөөд олон кинонд арын албаны туслахаар ажиллаж, ангийнхантайгаа «Самрагчид» киног бичиж, гол дүрд нь тоглосон. Үзэгчид түүнийг «Гарц» олон ангит киноны бүтэлгүй ч цайлган Санчирын дүрээр сайн таньдаг болсон бөгөөд «Золиос 6/16», «Аавуудын цэцэрлэг», «Life is love», «Хурим сүйтгэгчид», «Халуун бороо», «Гарц 3: Төгсгөл», «Жаргаж үзээгүй нар», «In da haus 2» зэрэг бүтээлд дүр бүтээжээ.

СУИС-д орохоосоо өмнө «Нарантуул» зах дээр өндөг зардаг байхдаа тэрэг түрдэг Б.Буянтогтохтой танилцсан нь хожим нэг ангид суралцаж, салшгүй найз, хамтрагч болох эхлэл байв. Хоёул ANBU продакшныг үүсгэн байгуулж, SoMedia платформын санхүүжилтээр анхны киноо болох «Dolge ажиллагаа»-г бүтээсэн. Дараа нь «Нусан багаяа» 1, 2, «Манай байр Америк» инээдмийн кинонуудыг үзэгчдэд хүргэжээ. Гэр бүлдээ хоёр хүүхдийн аав.