БАТЖАРГАЛБЯМБАСҮРЭН

Батжаргал Бямбасүрэн 1999 оны арванхоёрдугаар сарын 11-нд төрсөн. Багадаа дуучин болохыг мөрөөддөг байсан ч ахлах ангид байхдаа жүжигчний мэргэжилд сэтгэл нь татагджээ. СУИС-д шалгуулахад эхний 40 хүүхдийг элсүүлэхээр болоход тэрбээр яг 41 дүгээрт жагссан байв. Гэвч Кино урлагийн дээд сургуульд тэнцэж, жүжигчин Б.Даваасүрэнгийн шавь болон 2021 онд төгссөн. 2020 онд “My Voice” шоуны шилдэг оролцогчоор шалгарч, дуучны авьяасаа ч нуугаагүй юм.

Дэлгэцэн дэх анхны олон ангит бүтээл нь 2022 оны “Running” бөгөөд тэнд өөрийнх нь нэрээр Бямбаа гэдэг дүрд тоглосон. Мөн онд “Өвөөгийн хайр” ОАУСК-нд ажиллав. Харин 2023 онд найруулагч Б.Ганболдын “Намаг” уран сайхны киноны гол дүрд сонгогдсон нь түүний нэрийг үзэгчдэд таниулсан эргэлтийн цэг болсон. Сонгон шалгаруулалтад ирсэн олон жүжигчний дундаас хамгийн сүүлд уулзаж байж сонгогдсон тэрбээр Ц.Төмөрбаатар, Ш.Доржсүрэн зэрэг ахмад уран бүтээлчидтэй хамт ажиллаж, гудамжаар алхаж буй ганцхан үзэгдлийг 13 удаа давтан авахуулж байжээ.

Түүнээс хойш “Ахан дүүс”, “Гуравхан удаа”, “Нутгийн зүг”, “Амьдралын урт замд”, “Харанхуйн нууц” зэрэг уран бүтээлд дүр бүтээсэн. 2024 онд “Өв залгамжлагч” ОАУСК-ны Итгэлийн дүрээр өргөн үзэгчдийн танил болж, 2025 онд “Ганц бие аавууд”, “Надад ирээгүй хайр” кинонд ажиллав. 2026 онд “Орь дуу”, “Холын чимээ”, “Крашаа эзэмд” гэсэн шинэ бүтээлүүдийн гол дүрд тоглож байна. Хувийн амьдралдаа жүжигчин Б.Хунцэнгүүнтэй хамт байгаа бөгөөд “мэргэжлийн жүжигчин л баймаар байна” гэдгээ ярилцлагадаа онцолсон удаатай.